കേരള സംസ്ഥാന സ്‌പോര്‍ട്‌സ് കൗണ്‍സിലിന്റെയും കണ്ണൂര്‍ ജില്ലാ സ്‌പോര്‍ട്‌സ് കൗണ്‍സിലിന്റെയും സംയുക്ത ആഭിമുഖ്യത്തില്‍ നടക്കുന്ന സംസ്ഥാന സീനിയര്‍ പുരുഷ വനിതാ വോളിബോള്‍ ചാമ്പ്യന്‍ഷിപ്പ് 2022 ജൂലൈ 16 മുതല്‍ 19 വരെ കണ്ണൂര്‍ മുണ്ടയാട് ഇന്‍ഡോര്‍ സ്റ്റേഡിയത്തില്‍ വെച്ച് നടക്കുമെന്ന് ഭാരവാഹികള്‍ കണ്ണൂരില്‍ വാര്‍ത്താസമ്മേളനത്തില്‍ പറഞ്ഞു.
ദേശീയ-അന്തര്‍ദേശീയ വോളിബോള്‍ താരങ്ങള്‍ വിവിധ ജില്ലകളെ പ്രതിനിധീകരിച്ച് കളത്തിലിറങ്ങും. പുരുഷ വിഭാഗത്തില്‍ 14 ഉം വനിതാ വിഭാഗത്തില്‍ 11 ഉം ടീം മത്സരിക്കും. വര്‍ഷങ്ങള്‍ക്ക് ശേഷമാണ് ഒരു അന്തര്‍ ജില്ലാ വോളിബോള്‍ മത്സരത്തിന് കണ്ണൂര്‍ ആഥിത്യം വഹിക്കുന്നത്‌.
ചാമ്പ്യന്‍ഷിപ്പിന്റെ ഉദ്ഘാടനം ശനിയാഴ്ച വൈകുന്നേരം 4 30ന് കണ്ണൂര്‍ നിയോജക മണ്ഡലം എംഎല്‍എ രാമചന്ദ്രന്‍ കടന്നപ്പള്ളിയുടെ അധ്യക്ഷതയില്‍ കേരള കായിക വകുപ്പ് മന്ത്രി അബ്ദുല്‍ റഹ്‌മാന്‍ നിര്‍വഹിക്കും. തദ്ദേശസ്വയംഭരണ വകുപ്പ് മന്ത്രി എം വി ഗോവിന്ദന്‍ വിശിഷ്ടാതിഥി ആവും. മേയര്‍ ടി ഒ മോഹനന്‍ കേരള സ്‌പോര്‍ട്‌സ് കൗണ്‍സില്‍ പ്രസിഡന്റ് ഒളിമ്പ്യന്‍ മേഴ്‌സിക്കുട്ടി എന്നിവര്‍ മുഖ്യാതിഥികളാവും.
ചാമ്പ്യന്‍ഷിപ്പിന്റെ മുന്നോടിയായുള്ള പ്രചരണ വോളി നാളെ വൈകിട്ട് 4 30ന് കണ്ണൂര്‍ മുണ്ടയാട് ഇന്‍ഡോര്‍ സ്റ്റേഡിയത്തില്‍ വച്ച് നടക്കും. സിനിമാതാരം സന്തോഷ് കീഴാറ്റൂര്‍ നേതൃത്വം നല്‍കുന്ന കണ്ണൂര്‍ പ്രസ്സ് ക്ലബ്ബും ജില്ലാ കളക്ടര്‍ എസ് ചന്ദ്രശേഖര്‍ ഐഎഎസ് നേതൃത്വം നല്‍കുന്ന ജില്ലാ സ്‌പോര്‍ട്‌സ് കൗണ്‍സിലും തമ്മിലാണ് പ്രദര്‍ശന മത്സരം. സിറ്റി പോലീസ് കമ്മീഷണര്‍ ആര്‍. ഇളങ്കോ, മുന്‍ ഇന്ത്യന്‍ ഫുട്‌ബോള്‍ താരം സി. കെ വിനീത്‌, മീഡിയ പ്രതിനിധികള്‍, കായിക, സാംസ്‌കാരിക രംഗത്തെ പ്രമുഖര്‍ തുടങ്ങിയവര്‍ പങ്കെടുക്കും. കാണികള്‍ക്ക് ഗാലറിയില്‍ ഉള്ള പ്രവേശനം സൗജന്യമായിരിക്കും.
സമാപനദിവസമായ 19ന് ഉച്ചയ്ക്കുശേഷം 3. 30ന് വനിതാ വിഭാഗം ഫൈനലും 5. 30ന് പുരുഷവിഭാഗം ഫൈനല്‍ മത്സരവും നടക്കും. തുടര്‍ന്ന് മത്സര സമാപന പരിപാടിയും സമ്മാനദാനവും നടക്കും. വാര്‍ത്താസമ്മേളനത്തില്‍ സംഘാടക സമിതി ചെയര്‍മാന്‍ പി. പി ദിവ്യ, കെ. കെ പവിത്രന്‍, ഡോ. പി. പി ബിനീഷ്‌, ഷിനിത്ത് പാട്യം എന്നിവര്‍ പങ്കെടുത്തു.
.gif)
