ഇന്ത്യയിലെ ഏറ്റവും സമ്പന്നനായ രാഷ്ട്രീയക്കാരൻ എന്നറിയപ്പെടുന്ന എൻ നാഗരാജു കർണാടക തെരഞ്ഞെടുപ്പിന് മുന്നോടിയായി നാമനിർദേശ പത്രിക സമർപ്പിച്ചു. കർണാടകയിലെ ചെറുകിട വ്യവസായ മന്ത്രിയായ എന്ഡ നാഗരാജുവിന് 1,609 കോടി രൂപയുടെ ആസ്തിയാണ് ഉള്ളത്. തെരഞ്ഞെടുപ്പ് നാമനിർദേശ പത്രികയിലാണ് ഇക്കാര്യം രേഖപ്പെടുത്തിയിരിക്കുന്നത്. ഹോസ്‌കോട്ടെ മണ്ഡലത്തിൽ നിന്നാണ് ബിജെപിയുടെ സ്ഥാനാർത്ഥിയായി നാഗരാജു ജനവിധി തേടുന്നത്.
കർഷകനെന്നും വ്യവസായിയെന്നുമാണ് നാമനിർദേശ പത്രികയിൽ നാഗരാജു ജോലി രേഖപ്പെടുത്തിയിരിക്കുന്നത്. 536 കോടി രൂപയുടെ ജംഗമ സ്വത്തും 1073 കോടി രൂപയുടെ സ്ഥാവര സ്വത്തുക്കളുമാണ് നാഗരാജുവിന്റെ പേരിലുള്ളത്. 98.36 കോടി രൂപയാണ് കടമായി രേഖപ്പെടുത്തിയിരിക്കുന്നത്.
72 കാരനായ നാഗരാജു ഒൻപതാം ക്ലാസ് വരെ മാത്രമേ വിദ്യാഭ്യാസം നേടിയിട്ടുള്ളു. 2018 ൽ ഹോസ്‌കോട്ടെ നിയമസഭാ മണ്ഡലത്തിൽ നിന്ന് കോൺഗ്രസ് ടിക്കറ്റിൽ വിജയിച്ച വ്യക്തിയാണ് നാഗരാജു. 2019 ൽ കോൺഗ്രസിൽ നിന്ന് കൂറുമാറിയ 17 എംഎൽഎമാരിൽ ഒരാളാണ് നാഗരാജു. ഈ കൂറുമാറ്റമാണ് കോൺഗ്രസ്-ജെഡിഎസ് സഖ്യ സർക്കാരിന്റെ തകർച്ചയ്ക്ക് കാരണമായത്.
.gif)
