ലെക്‌നൗ: ഉത്തര്‍പ്രദേശില്‍ ഐപിഎല്‍ വാതുവെപ്പ് സംഘം പിടിയില്‍. അഞ്ച് പേരടങ്ങുന്ന ഒരു സംഘത്തെയാണ് നോയ്ഡയില്‍ നിന്ന് പിടികൂടിയത്. രാജസ്ഥാന്‍ സ്വദേശികളായ ആനന്ദ് സ്വാമി (26), ശ്രേയാഷ് ബല്‍സാര (27) ഹരിയാനക്കാരായ രോഹിത് ശിവജ് (20), പരസ് മഗു (30), സുമിത് ദഹിയ (25) എന്നിവരാണ് പിടിയിലായത്.
കഴിഞ്ഞ നാല് വര്‍ഷമായി വാതുവെപ്പ് നടത്തുന്ന സംഘമാണ് കുടുങ്ങിയത്. വിവിധ കമ്പനികളില്‍ ജോലി ചെയ്യുവരാണ് സംഘാംഗങ്ങള്‍. ഇന്ത്യന്‍ പ്രീമിയര്‍ ലീഗ് നടക്കുന്ന സമയത്ത് ഇവര്‍ ഒത്തുചേരും. പിന്നീടാണ് വാതുവെപ്പ്. സുമിത് ദഹിയയാണ് ഇതിനു പിന്നിലെ ബുദ്ധികേന്ദ്രം. ഇയാള്‍ ബിബിഎ ബിരുദധാരിയാണ്. മറ്റ് നാലു പേര്‍ ബിടെക് ബിരുദധാരികളാണ്.
ക്രിക്കറ്റ് ലൈവ് ആപ്പ് എന്ന ആപ്ലിക്കേഷന്‍ തങ്ങളുടെ ലാപ്‌ടോപ്പില്‍ ഡൗണ്‍ലോഡ് ചെയ്ത ഇവര്‍ എല്ലാ മത്സരങ്ങളും ലൈവായി കാണാറുണ്ടായിരുന്നു. ടെലിവിഷനിലൂടെയുള്ള ടെലികാസ്റ്റ് ഇതില്‍ നിന്ന് മൂന്നോ നാലോ സെക്കന്‍ഡ് വൈകും. ഈ സമയം ഉപയോഗിച്ചാണ് ഇവര്‍ വാതുവെക്കുന്നത്. എല്ലാ മത്സരത്തിലും സംഘത്തിലെ ഒരാള്‍ സ്റ്റേഡിയത്തിലാവും. ഇയാള്‍ നല്‍കുന്ന വിവരങ്ങളും വാതുവെപ്പില്‍ നിര്‍ണായകാമാവും. ഇത്തരത്തില്‍ ഇവര്‍ ഒരുപാട് പണമുണ്ടാക്കിയിരുന്നതായി പോലീസ് പറയുന്നു.
.gif)
